Mien allerleefste Kuuskes en Kuus: ’t Hoëge woord is d’r oet: ich bin Prins van de Dörper Kuus!

4 Mandj lang zwiege, geheime aafsjpraoke met de Prinsecommissie, oore naodinke over de sjpreuk, whatsapp op sjlot gezat zoedet de kinger niks per ongeluk laeze en leege tegen aojers, sjoeënaojers vur warum we nou wèr oppas nuddig heije….
In de tussentied nog veul sjtress gehad vanwege afgescheurde kruutsbank (wie mot ich dao nòw polonaises mit renne?!?), vingers die der bijna aaflooge door de cirkelzaag en unne navelbreuk. Heb gesjpeuld mit de gedachte um mich tot 18 november in de middig op te sjloete…
En as of ’t nag neet erger kos, waas dao de club van 33 fieëst-aovend op 4 november…. ’t Leek wel as of ich ’t op miene kieëbus gesjreeve hej sjtaon: ich waer Prins…
Leege is niet mien sjterkste punt, en al zeker neet asse elke 10 minuten in unne hook wörs gezat door 6 man die dich met de pul beer oppe nek vertellen desse prins wörs (’t woort nag neet ins mier gevraogd).
Zatterdig 18 november leek wel 48 oor in eine daag te hebben, zoewe lang deurde dae… Zatterdige zien heej auch “aanwej-daag”, dus ’t bezeuk dat kwaam, vakkundig wig motte haoje beej de koelkasten, hangtaofels en liters soep die we al klaor heje sjtaon in hökskes en onger dekes.

Zatterdig 18 november 20:11 oor, ich gaot in de rej sjtaon vur de penninge en…… neemes verdinkt mich, heb gesjprekke over waem d’r Prins wurd en ich veul mich eigelijk wel good. Taktisch ving ich ’n plekske aan de rank van de zaal en plotseling waer ik door Matje naor achter geroope: ’t is zoewiet. Nog ff 3 keer pisse en dan onger de kop.
’t Oetkoome waas prachtig: alle energie kwaam d’r oet van de 4 mandj geheim haoje en eindelik koste mien 3 manne zeen det heure pap de Prins waas. Wat waren ze trots toen ze same met mich op de buhne mochte sjtaon.
Daonao mien irste polonaises door de zaal getrokke en van veule minse een hendje gekrege met felisitaties. Tot in de late eurkes een pilske, jaegerke, borrelneutje en soep met de Kuus en toen voldaon, um 4 oor ’t bid in.
De waek daoanao waar magisch. Kinger die dich op sjtraot met ope monk aankieke, minse die sjpontaan un liedje vur dich sjrieve en half bekinde die dich superenthousiast feliciteren, fantastisch!

Volgende halte: Zatterdig de 25e, de liedjesaovend en mien irste optraeje in functie as Prins. Genote van de Dörper artieste die wèr eei 8-tal goje nummers met veul energie op de buhne zatte. De presentatiepries vur 6 fleskes beer waas mier dan terecht, dao gaon we deze vastelaovend nog veul sjpierpien van hebbe as det veul gedreijd geit waere. De winnaar van dit jaor is veural miene Adje bleej mit. Atje vur Adje, van de Propellors. As de DJ dae dreijt kin ik effe beejkome en moog miene Adje gaas gaeve, bedankt Propellors!
Nòw 5 waeke geneete, beejkoome en oplaaje vur ’t korte seizoen wat d’r aan geit komme en we sjtart op 5 jannewarie met ’t P&M liedjesfestival in Beringe. Ich hoop uch dao allemaol te zeen um de Propellors nao de winst te sjriewe! Daags d’r nao natuurlik de kaartverkaup van oos eige Dörper Zittinge en saoves ’t oetkomme van de Jeugdprins, benejd waem det same mich mich over Dörp geit regere deze vastelaovend.
De waeke daonao zeen ich uch natuurlik gaer oppe zittinge of ein van de recepsies en, uiteraard, de vastelaovend zelf.
Ich wins idderein alvas hiele sjoene kerstdaag en ein geweldig nej jaor.

Sjloet ik aaf met miene spreuk: Vur de sjpreakstool gemak, nòw as Prins volle bak!